Al djote

Po èsse bin sûr ki l’ mwê timps èst houte,
Choûtez, s’ on crîe, bin hônt : « ôs cabus ! »
N’ confondez nin, c’ n’ èst nin dol surcroûte,
Mês dès tot ptits k’ i fôt vèye créchu.
I vint tos l’s-ans, dès-omes pwartant hote ;
Èh bin, c’ èst zês k’ anoncèt l’ bon timps ;
I l’ assurè, v’s-ofrant leûs ptites botes,
Tint k’ l’ oronde l’ afirme ôntrumint
K’ avu dol djote.

Nôns mèssadjîs pônrint tirè glware
La, d’ anoncè ku l’ bê timps è vnu.
I djèt mo vrê ; lu solê dvint fwart
La tère s’ ègatche a tot fè sônrtu :
Lès grin.nes, lès trukes.
Cant a nôns bones plantes
K’ on vint d’ achtè, rupikées ôs cortis,
Dlé lès-êres du poussée pus lante,
Zèles, èles vônront s’ sutinde, s’ arondi,
Po duvnu djote.

On l’ èspère bin, n’ fôt nin k’ ça toûne mô,
S’ l’ êwe nu manke nin, si lès lêdes olines
Èt lès lum’çons n’ vènèt nin pa t’t-avô
Lès bèles grandes fouyes, totes an crinoline,
Malin l’ ci qui pônrot l’s-apêtchè
Cès gourmands la, d’ fè dès trôns s’ leû passadje,
Dvant ku l’ cabu n’ soye bin foûrmè
Fôt k’ i mostreûche in bê gros visadje
Po k’ i soye djote.

On dit k’ lès rpas dvèt tchandjè sovint.
Pa dès pètotes, dès pwès, dès rècines,
Èt dol salôde. Tot l’ èstè, ça vint.
Dès bones kichôtes vnèt même dins lès spines
Mês a l’ ivièr ! Sondjez cwè ôrez ?
Dès trukes a chape ? Cand l’ gros cabu manke,
Pa trante-chî plats, vos l’ ramplaçrez ;
Pus vos v’ plindrez, k’ ça coste biyèts d’ banke
Èt v’ srez sins djote.

Mês eûreûsmint, voci l’ abondance,
Zês, tot l’ èstè, ont stî admirè,
On n’ è rpwate ku deûs twas dins ène banse,
On pônrè fè marinde èt sopè.
Çu n’ èst nin l’ tot. V’ lî dvez ène ônte sogne
Vos alez m’ dîre : « bin, cwè fôt-i d’ pus
S’ la djote èst creûsse, vônrîz co k’ on grogne ? »
Vos l’ advinez : l’ couchè dins l’ cabu,
Lu cûr al djote.

Ôs cîs ki vnèt co bin v’ tourmantè,
Vos djez : « sés-s’ bin, twè, t’ îrè al djote ! »
C’ èst vite compris, sins trop s’ ècsplikè.
« Tinre come dol djote », vla dès paroles sotes
Èles nu vantè nin assez l’ cabu.
Cand i vêront, lès Gaumais, fjez rprotche :
« Vosse hote èst ptite, dîrez ; m’ è fôt dpus
Dj’ è vu brâmint, èt dpus d’ blancs ku d’ rodjes
Po fè dès djotes ! »

Pîre Djônsèf Dosimont (en wallon d’Arville)

Malêjis mots
cabu : chou
(a) chape : en remplacement
cûr : cœur
djote : chou adulte
kichôte : ortie
marinde : dîner
mwê : mauvais
oline : chenille
oronde : hirondelle
rècine : carotte
surcroûte : choucroute
truke : pomme de terre
zê : eux.