Bons condjîs a vozôtes terto(te)s
Mucyin Mahin
Texte
Ratacaedje.
Sol tins ki l’ dierinne Rantoele esteut el posse, Brussele esteut atakêye. Des Walons et des ôtes, di totes les nåcionålités morît, di cåze del waraexhreye des omes. Les cis k’ evoyèt traitreuzmint des bombes avou leus avions, et les ki s’ distrujhèt po touwer.
Li Bon Diu leu-z åmes a tertos. Pôreut vali k’ on djoû, les ptitès djins comprindénxhe ki tos ces djeus la sont decidés pa les gros martchands d’ canons, et çoula dispu ki l’ monde est monde. Dedja do tins del Walatlande (loukîz p. 12-15). Ni nos metans nén avou zels tot cwerant a s’ rivindjî so des tropes di djins ki n’ è plèt rén. Ni tot shuvant biesmint les dires des posses-et-gazetes, mwaistris pa les minmes gros-colés.
Mins come on dit todi, li veye tchereye sins rla. Djåzans d’ ôte tchoi, djåzans macrales.
Divant d’ aler e condjî
Divant d’ aler e condjî, si vos è prindoz asteure, pinsez a-z emoenner do lijhaedje e walon. Nos vos ndè propôzans deus troes dins ç’ Rantoele cial (p. 2 & 18). Si vos n’ avoz waire di cwårs, profitez des meyeus-tins (bonmartchîs pris) k’ i gn a par ci par la. El Tunizeye, metans, on ptit payis ki parvént tot doûçmint a rexhe del haeyime d’ après l’ revintreye [haine post-révolutionnaire]. Et prinde totes les pårteyes del societé po moenner l’ payis, tot cwerant des mitan-voyes [solutions de compromis]. Ou å Marok, la k’ vos seroz pus e såvrité k’ a Brussele, et wice ki, dins des ptitès coines k’ i gn a, on djåze walon. Raguidez l’ fime « Li langue åd dibout del linwe » da Zavî Istasse, ki s’ vind a DVD, si vos n’ mi croeyoz nén.
Ni djhoz nén ki les areyoplanes sont dandjreus. C’ est bråmint pus riskeus di prinde voste oto. Gn a bén dpus d’ moirts å kilomete so les voyes ki dins les airs. Li tchåfeu del tcherete so s’ toet ciddé padrî el sait bén, la, lu ! A s’ dimander si les vraiys terorisses, ci n’ est nén les politikîs et les mwaisses d’ industreye des payis ki fabrikèt des moteurs ki polèt fé do 150-180, dabôrd ki cåzu tos les estats ont ene limotche di vitesse a 120 km a l’ eure.
Mins divant d’ aler e condjî, djans, sayîz di vos ateler ås bates del « fiesse ås lingaedjes walons » (vizez p. 21). Et vos dire ki, sapinse a Pire di Coubertin, li tot, c’ est nén d’ wangnî, c’ est d’ prinde pårt.
Lucyin Mahin, li 20 di may 2016