Cârnaval

(en wallon namurois / walon d’ Nameur èt avaur-là)

Cârnaval, cârnaval
Mètoz vos masses !
Mascarâde, mascarâde
Vèyoz tos lès faus-visadjes !
Véci on leup,
Vélà one tièsse di baudèt !
Waî ! Avaur-là, on diâle avou on riv’nant !
Poqwè nin one mamesèle catchîye padrî on Chinèl !
Savoz bin qwè ?
Dj’a vèyu on sorèt rabrèssî on tchèt,
On sauvadje fé on bia daladje,
Li tch’vau-godin zoubler pad’zeû on-Ârlèquin,
Cit’lale atèléye come on sbara avou on tchapia di strin,
Cit’ci agayolé come on crapôd-vèlin !

Mascarâde, mascarâde à deûs visadjes,
On djoû ârsouye, on djoû bin sâdje !
Maîs padrî totes lès sôtes di masses,
Vos-avoz todi
Lès minmès djins,
Mwinrnant l’ minme vicaîrîye !

© Gérard BEAUMONT, revue Les Cahiers wallons - Rèlîs Namurwès, n° 5, sept-oct 2022