© 2015, Josse Goffin, Regard à gauche

Quand ç’ n’èst nin Djan, c’èst Djène

Alain Baume

Texte

Meûûûûûûûûûûûûûûû…
Tènoz, one vatche ! Gn-a rin d’ drole à ça : à Malon.ne, on-z-èst quausu al campagne !

Tot causant d’ vatche, savoz bin qu’i-gn-a deûs sôrtes d’afaîres qui brotchenut foû d’one vatche ?

Do lacia… Ça, tot l’ monde li sét bin, dji n’ vos va nin fé on dèssin… Èt… dès flates !

Po lès flates, quand ç’ n’èst nin Djan, c’èst Djène. Fuche-t-i qui l’flate tchaîye dins l’ pature, fuche-t-i qu’èle tchaîye au plin mitan dèl vôye…

Si èle tchaît dins l’ pature, gn-a rin avou ça. Si èle tchaît au plin mitan dèl vôye, quand ç’ n’èst nin Djan, c’èst Djène : fuche-t-i qu’èle fuche tote sètche, fuche-t-i qu’èle fuche tote noûve.

Si èlle èst tote sètche, gn-a rin avou ça. Si èlle èst tote noûve, quand ç’ n’èst nin Djan, c’èst Djène : fuche-t-i qu’on l’ veûye, fuche-t-i qu’on nè l’ veûye nin.

Si on l’ veut, gn-a rin avou ça. Si on nè l’ veut nin, quand ç’ n’èst nin Djan, c’èst Djène : fuche-t-i qu’on n’ passe nin d’ssu, fuche-t-i qu’on passe dissu.

Si on n’ passe nin d’ssu, gn-a rin avou ça. Si on passe dissu, quand ç’ n’èst nin Djan, c’èst Djène : fuche-t-i qu’on s’è rinde compte, fuche-t-i qu’on n’ s’è rinde nin compte.

Si on n’ s’è rind nin compte, gn-a rin avou ça. Mins, si on s’è rind compte…

Lès choûteûs : quand ç’ n’èst nin Djan, c’èst Djène !

È bin nonfaît, mès djins ! Si on s’è rind compte, on s’ dit : « Godom’ di godom’, gn-a deûs sôrtes d’afaîres qui brotchenut foû d’one vatche : do lacia èt dès flates ! »

Quand ç’ n’èst nin Djan, c’èst Djène : de deux choses l’une.

 


© Alain Baume, Revue Cahiers wallons-Rèlîs Namurwès, n°6 nov-décembre 2021
D’après on conte ètindu raconté pa Dédé què l’aveu ètindu raconté pa Jean-Marie què l’aveu ètindu…
èt r'mètu è walon d'après Nameur pa A. Baume / Rèlîs Namurwès



 

Metadata

Auteurs
Alain Baume
Genre
Conte
Langue
Wallon de Namur
Relation
Revue Cahiers wallons-Rèlîs Namurwès n°6 nov-décembre 2021
Droits
© Alain Baume, Revue Cahiers wallons-Rèlîs Namurwès n°6 nov-décembre 2021