Treûs rôses po m’ Moman (in Saquants bias boquèts)

D’vant vosse pôrtraît, su l’ tchiminéye,
Moman, dj’aî apwartè treûs fleûrs
Treûs rôses qui s’ drovint al roséye ;
Djo l’s-aî tchûsi di treûs coleûrs.

Dj’aî codu l’ rôse, li tote prèmîre,
En m’ sov’nant dès ridaus di m’ lèt
Qui s’ drovint avou vosse sorîre
Èt s’ cloyint avou on coplèt.

Li blanke, rèwaye dins mès pinséyes
Dès sov’nances di m’ vîye di gamin,
Come ossi dol blanke mèche côpéye
Su vosse front au dêrin momint.

Li rodje, c’èst l’ coleûr qui dj’èpronte
Au coq walon, qu’i-gn-a longtimps
Vos m’avèz faît inmè sins honte
Èt promète do sièrvu tot l’ timps.

Quand l’ dêrin.ne ponte sèrè clawéye
Qui dj’ sèraî stindu dins m’ vachê
Dj’auraî su m’ keûr treûs fleûrs souwéyes,
Treûs pôves rôses dins on sètchê.

Édouard Peraux (1909-1970), Nassogne, In CW, 1971 / 5.