Academeyes, rifondaedje, envd.

Li walon, c’ est on lingaedje fwait pa ki ? Taiss ki c’ est on lingaedje naturel. Adon, i n’ a nén stî edvinté pa ene sakî. Ci n’ est nén di l’ esperanto ubén do volapouk.

Droci, dji n’ cåze nén d’ ès-n askepiaedje. Cwè k’ ça sreut foirt ahessûle di fé on tecse sol sicrîta : dj’ ô bén l’ vî walon. Dji dvize puvite sol comint el walon est mamborné, dins l’ bea sinse do mot, da.


Academeyes ?

Sovint, les pårlers sont viernés pa des soces. Metans, li francès. On-z a, d’ aboird, l' Académie Française ki dmeure el pus impôrtante, tot-z estant l’ pus schoûtêye. Houte di çoula, vs avoz eto deus ôtès academeyes : ene e l’ Beldjike ey ene ôte e Kebek. Mins å pus sovint, les lingaedjes n’ ont k’ ene seule academeye, come li daenwès. Pus råle : les cis ki n’ end ont pont. Vloz èn egzimpe ? L’ inglès. El savîz ? Si neni, estoz vs esbarés ? Li lingaedje li pus eployî inte diferins payis n’ a nén sintou l’ mezåjhe d’ awè ene academeye. Come cwè...


Pol walon

Amon nozôtes, mwintès soces si rwaitnut voltî come estant les sorwoeyantes do lingaedje Defrecheux. Taiss k’ oyi k’ l’ idêye di ces organizåcions la est onoråbe. I fåt, come d’ efet, ene sôre d’ otorité, oudonbén tchaeconk pôreut fé come i vout. Dalez m’ rimimbrer ki l’ inglès n’ end a nole. C’ est l’ veur. Mågré tot, gn a des rlomêyès univiersités (Oxford, Cambridge, et tchik et tchak) k’ î metnut leu ptit grin d’ sé.
Dins les soces ki propôznut èn ecådraedje do scrît walon, dji va-st ataker avou l’ cene ki dji cnoxhe el mî : Li Rantoele. C’ est l’ seule ki boute avou l’ rifondou. C’ est, djustumint, onk di ses beas costés : d’ ovrer e rfondou. L’ avance do rfondou, c’ est bén d’ esse comprindåve pattavå l’ Waloneye. Çou k’ est totsu bén avou zels, c’ est k’ i n’ rioistêynut nén l’ Feller evoye. Lucyin Mahin, l’ ome el mî cnoxhou deL Rantoele, porshût a scrire avou s’ Feller, ‒ u l’ Feller des ôtes cwand i riscrît des tecses di dvant Feller so Wikisourd.
Les gaztîs ki screynut dins ç’ gazete la cåznut di sudjets d’ tos les djoûs. Dins les ôtes gazetes e walon, vos liroz puvite des tecses « univiersels » (powezeyes, fåve do vî vî tins). Come si les oteurs vicrént dins on monde la ki l’ walon åreut yeu stî egayolé avou des sudjets et on motlî decidés d’ avance.


Li rfondaedje : trop rade adiercî ?

Mins les prumîs rfondeus n’ ont i nén stî ene miete trop rade ? Dj’ ô bén k’ on n’ såreut clawer l’ ortografeye d’ on lingaedje après kékes raploûs k’ i gn a yeu aprume inte 1995 et 2002, pu di tenawete après. Lacobén k’ on a veyou sacwants candjmints dispu. Des ptits candjmints, siya, mins ça vout mostrer ki rén n’ est aclatchî. Metans, gn a des sacwès k’ avént stî atåvlêyes, mins ki n’ ont nén passé : li betchfessî LH, paregzimpe. ( Li betchfessî LH åreut permetou d’ rashonner les prononçaedje avou L eyet les cis des minmes mots avou Y (*rantoelhe, *stoelhe, *tchandelhe). Li scrijha si voet dins, pol moens, on mot d’ vî walon (li viyaedje di Påye, sicrît « Pailhe », dé Havlondje). Il egzistêye eto e portuguès avou l’ valixhance di Y. Mins ces ortografeyes la ont stî djudjeyes pår trop dizôrnantes [perturbantes].)


Novea rfondou

N a des sakîs k’ ont pinsé a èn ôte rifondou, lomé el « rifondou avancivös » (Rantoele 102 p. 17). Gn a on live k’ a rexhou lanawaire so ç’ pordjet vola. Les esplicaedjes sont fén spepieus : ene clapante aleure ki sint l’ serieus. Seulmint, dji croe k’ ces ovreus la pinsnut dpus k’ i n’ fåt a l’ etimolodjeye. Djans : al môde do francès. Dji sai scrire e rfondou « wårdiveus », dji sai lére les sistinmes Feller, mins dj’ a afeye do må timpesse a-z etinde l’ « avancivös ». Li ci ki vicrè sårè c’ est l’ ké des sistinmes - s’ end a onk - ki serè co la e 2100.

Samuël Dumont, so Belletristica, li 8 d’ octôbe 2022
© licence de libre utilisation CC-BY-SA 4.0 de la Fondation Wikipedia